讀緊 Asso 重考 DSE (Retake DSE)

Year 1 開學冇耐，好多人就開始諗：DSE 英文差少少，讀緊 Asso 嘅同時要唔要重考？理論上係可以，但一邊追 GPA、一邊準備 DSE，時間真係會好緊。報名前，最好先諗清楚自己重考係為咗乜，目標課程又係咪真係需要你補返個成績。

點解有人會想重考？

DSE 英文未達 Level 3：部分大學課程對英文成績有指定要求，retake可以係其中一個補救方法。
想多一條升學出路：一邊讀 Asso、維持 GPA，一邊爭取更好嘅 DSE 成績，等自己有多啲選擇。可以參考重考定讀 Asso。
想拉高 DSE 分數：如果你本身只係差幾分，或者某幾科成績未達到目標課程要求，重考可以爭取更好嘅成績。不過，各課程點計多屆 DSE 成績可能唔同，報名前要查清楚。

CA, Assignment 照樣要交：Asso 有功課、測驗、presentation 同考試，DSE 溫習時間只能靠自己安排，唔會因為你要重考而少啲功課。
最忙嘅時間可能撞埋一齊：DSE 備試高峰期，可能正正係 Asso 趕 CA、準備考試嘅時候。兩邊同時逼埋嚟，真係幾容易顧此失彼。
留意出席要求：唔同院校同科目嘅出席安排唔一樣。HKCC 一般唔會將出席率直接計入成績，但部分課程或活動仍有指定要求；HKU SPACE 部分課程則可能有出席要求，記得睇清楚自己科目嘅 course outline 同課程規定。
唔好一次過攬太多科：重考通常集中補一兩科，尤其英文，會比全科重考容易安排得多。讀緊全職 Asso 仲要兼顧全科 DSE，工作量真係唔少。

你嘅情況	比較適合重考 DSE	比較適合考 IELTS
英文本身唔差，想衝高分	係，目標係將 DSE 英文成績由 Level 4 推上 Level 5 或以上，爭取更好嘅成績組合	如果只係想證明英文能力，亦可以考慮
想再搏 JUPAS	係，重考可以爭取更高嘅 DSE 分數，增加選科同升學嘅選擇	IELTS 一般唔可以代替 JUPAS 計算 DSE 科目分數
目標課程要求特定 DSE 成績	係，直接針對相關科目爭取更高分	只有當課程接受 IELTS 作相關要求時先有用
只需要一個英文能力證明	未必需要為咗呢個目的重考 DSE	如果目標院校接受 IELTS，可以直接準備 IELTS
想同時讀 Asso、維持 GPA	要預留時間溫習，尤其係想衝高分嘅話，唔好低估工作量	考試時間比較有彈性，但一樣要準備，而且成績通常有有效期限制

讀緊 Asso 重考 DSE 定考 IELTS？比較只差英文、需要提高整體 DSE 成績、GPA 吃力同時間安排等情況

諗清楚先決定。如果重考真係對升學有幫助，就早啲安排溫習；如果現階段 GPA 已經好吃力，亦可以考慮先集中讀好 Asso，唔好為咗多一條出路，反而影響緊要嘅成績。

另外，記得留意各大學嘅 Non-JUPAS 申請死線，唔好去到申請先發現自己仲欠一個英文資格。

讀緊 Asso 可唔可以重考 DSE？

可以。符合考評局自修生報考資格，就可以按當年安排報名。至於學校會唔會因應你嘅 DSE 考試調整課程安排，就要睇返院校同科目規定。

淨係重考英文一科得唔得？

可以考慮只重考英文。至於報大學時可唔可以用新舊兩屆成績合併計算，要睇考評局安排同目標課程嘅收生規定，報名前最好確認清楚。

DSE 考試撞正 Asso 測驗點算？

唔好預學校一定會幫你改期。應該預早對好 DSE 同 Asso 嘅考試時間，真係撞期就盡早向課程負責人查詢有冇其他安排。

Retake會唔會拖低 GPA？

有可能。重考需要額外溫習時間，如果因此趕唔切交 CA、準備不足或者考試失手，就可能影響 GPA。尤其本身成績未穩定嘅同學，最好衡量清楚先決定。

IELTS 係咪比重考 DSE 英文容易？

大至上係。

IELTS 嘅其中一個優點係考試日期較有彈性，但仍然要預時間準備，而且要留意目標課程接受嘅成績及有效期。

各院校同課程對 DSE 英文、IELTS 及成績組合嘅要求都可能唔同，報名前記得查閱官方收生要求。