Turnitin 完全指南
交功課前最驚嗰個數字，唔係 GPA，係 Turnitin 百分比。先講結論：相似度唔等於抄襲分，幾多%先有事，官方從來無一條線，判嘅係老師。SPACE 用法嚟自學院 Turnitin 頁，報告解讀跟 Turnitin 官方學生指南。
SPACE 點用 Turnitin
「SPACE 點用 Turnitin」章節- 經 SOUL 交功課自動送檢，唔使另外申請 Turnitin 戶口、唔使 class ID（無嗰樣嘢）。
- 第一次用要撳連結接受 Turnitin 用戶協議先交到。
- 每科設定唔同：報告未必即時出，亦未必開放畀學生睇，睇科內指示。
- 接受格式一般係 Word／PDF／txt，檔案太大（幾十 MB）或頁數太多會被拒，轉細再交。
交功課流程本身睇返：SOUL 交功課。
點讀相似度報告
「點讀相似度報告」章節- 報告用顏色標示唔同來源（官方有 5 色制），要逐個來源睇，唔好淨係睇總數。
- 以下都會推高%：參考書目、常用片語、題目原文、之前自己交過嘅稿（存咗入資料庫會同自己撞）。
- 排除書目／引用要符合格式（例如 References 做標題、引文格式啱），而且設定一閂就打回原形——截圖留底你設過排除嗰版。
- 學生間常見慘案：上款下款、學號 email、封面格式都會計入%（LIHKG 討論有人成 22% 咁滯）。交之前刪走唔必要嘅個人資料欄。
幾多%先有事？
「幾多%先有事？」章節無官方線，但坊間經驗法則（參考用，唔係校規）：
| 範圍 | 一般解讀 |
|---|---|
| 20% 以下 | 通常安全，但要睇吓係咩來源 |
| 20–40% | 逐段check：大段連續命中就要改寫＋補引用 |
| 40% 以上 | 極大機會被叫去解釋，唔好交住 |
重點永遠係連續命中嘅長度同來源，唔係總數。一大段抄維基，總數得 15% 照樣出事。
AI 偵測（AI%）
「AI 偵測（AI%）」章節- Turnitin 有 AI 寫作偵測，AI% 要交咗先知，交之前無得自查。
- 學生間流傳：AI% 高會收到紀律聆訊（見 Threads 討論），誤判（自己寫都中）時有聽聞，但學院點用 AI% 做證據，以校方公布為準。
- 自保：AI 當腦震盪輔助（諗大綱、學 concept）可以，出字要自己寫；邊科准用 AI 先問老師（見 AI 工具政策），唔好估。
點樣合法降%
「點樣合法降%」章節- 引用→改寫→再引用：讀完閤埋書，用自己話寫，再加 citation。
- 一個觀點跟一個來源，唔好一段跟五個。
- 交之前自己讀一次：邊句唔係你諗嘅，就要 either 引用 or 改寫。
- 早交：留時間等報告出，唔得先有得改（有啲科只畀交一次，開學睇 Outline）。
常見問題
「常見問題」章節22% 會唔會被捉？ 睇來源唔睇總數。係書目＋封面格式就無事，係一段抄就出事。唔識睇就問老師，唔好問群組。
可唔可以交之前自己 check 一次？ SPACE 學生只可以經 SOUL 課內交，交嗰次就係正式嗰次。坊間自費查重站唔建議用：稿件會流入外部資料庫，下次交撞返自己。
AI% 幾多先有事？ 學院無公布線。穩陣做法係唔好交 AI 寫嘅字，請求先問老師。
報告唔開放畀學生睇點算？ 咁就無得預檢，唯有交之前做好引用，唔好博。
數字解讀以老師同校方為準，呢篇只教你讀報告，唔係免死金牌。