搵老師攻略
老師唔係淨係派分嗰個人：問啱嘢可以救 GPA、救 deadline、救升學。識搵老師係技術，唔係性格。
Email 格式（第一次就用啱）
「Email 格式（第一次就用啱）」章節- 用學校電郵（
學號@learner.hkuspace.hku.hk）發，私人 gmail 好易入垃圾郵件。 - Subject 寫清：
[科目編號＋班別] 事由，例如問功課、約 consultation。 - 內文三段：邊個（名＋學號＋班別）→ 咩事（一句）→ 想要咩（問問題／約時間，畀兩個時段揀）。
- 唔好半夜三更 send 完第二朝追，畀 2–3 個工作天。
Consultation hour 點用
「Consultation hour 點用」章節- 開學抄低每科 consultation 時間地點，唔好到出事先搵。
- 帶住具體嘢去：草稿一段、唔明嘅 concept、想 double-check 嘅方向。空手問「點先攞 A」係浪費大家時間。
- 問完即刻記低，轉頭就唔記得係常態。
Extension／求情點開口
「Extension／求情點開口」章節- 早開口：deadline 前講叫申請，過咗先講叫求情，兩個世界。
- 帶證明：病假紙、證明文件，口講無憑。
- 講方案：唔好淨係話做唔切，講埋幾時交到、交到幾多，老師易批。
- 接受唔批：批係人情，唔批係道理，唔好嬲，轉去諗補救（暑修、重修、保 CGPA）。
模板：直接改嚟用
「模板：直接改嚟用」章節病假／缺席通知（考試／交功課前發，唔好事後先講）：
Subject：[科目編號＋班別] 申請病假／缺席（名＋學號）
老師你好，我係 [名]（學號 [xxx]，[班別]）。因 [病／事由]，未能出席 [日期] 嘅 [課堂／考試／deadline]，證明文件隨附／後補。想請問補救安排（補考／延交／補堂），幾時方便再約？唔該老師。
Extension 申請（deadline 前至少幾日發）：
Subject：[科目編號＋班別] 申請延交 [功課名]（名＋學號）
老師你好，我係 [名]（學號 [xxx]）。[功課名] 原定 [日期] 交，因 [簡短原因]，想申請延至 [新日期]，目前已完成 [幾多%]。證明隨附。唔該老師考慮。
約 consultation：
Subject：[科目編號＋班別] 想約 consultation 問 [題目]（名＋學號）
老師你好，我係 [名]。想請教 [具體問題一句]，請問 [時段一] 或 [時段二] 方便嗎？草稿／問題已準備好，到時帶去。唔該！
求推薦信（最少預一個月，帶 CV＋PS 草稿去，唔好淨係掟個名）：
Subject：懇請老師寫升學推薦信（名＋學號＋報讀課程）
老師你好，我係 [名]（[班別]，你 [邊科／邊年] 學生）。我報緊 [大學＋課程] Non-JUPAS，想懇請老師做 referee。附件係我 CV＋PS 草稿＋申請死線（[日期]）。經 MyFuture 系統發出，唔會阻老師太多時間。唔該老師考慮！
推薦信要點儲
「推薦信要點儲」章節- 升學推薦信要 Year 1 開始儲：上堂問嘢、交足功課、consultation 見過面，老師先寫得出嘢。
- 開口最少預一個月，帶埋 CV＋PS 草稿＋報咩科畀老師，唔好掟個名就叫人寫。
- 經 MyFuture 申請（見 transcript 嗰篇），唔好叫老師私人 email 發。
常見問題
「常見問題」章節老師唔覆 email 點算？ 先 check 自己 subject 寫得清唔清、係咪學校電郵發。兩三日無覆，consultation hour 當面問。
英文唔好，唔敢開口？ Email 寫好過講，慢慢寫，Grammarly 執一次。老師睇內容，唔係考你英文演講。
投訴老師得唔得？ 有正式渠道（經 College Office／學生事務），唔好喺群組公審先，公審對自己無好處。
老師係資源唔係老闆，識用就係你嘅優勢，唔識就係人哋嘅。